قصة شهيد ابكتني مؤلمة جدا ....الله يرحمه
سلوى نصار
أنا محمد صيام عمري 14 سنة من قطاع غزة الجريح، في الحرب الأخيرة قصفوا الصهاينة بيتنا واستشهد 12 شخص من عائلتي بما فيهم إمي وأبوي واخواتي، وأنا كنت الناجي الوحيد بينهم .. انقطعت رجلي وجهازي التنفسي صار فيه مشاكل، سمعت الأطباء بيقولوا مشكلة في الرئة، نقلوني على مستشفى في تركيا ووعدوني يركبولي رجل اصطناعية ﻷرجع أسابق كل ولاد صفي بالمدرسة .. أنا كنت أسرع واحد فيهم ودائما أفوز بالسبق !عملت بالمستشفى صداقات كتير واجتني هدايا كتير وكانت أكبر أمنية عندي أزور صديق إلي بالقدس وكان يوعدني نروح نصلي هناك وناكل كعك عند باب العمود .
الأطباء اليوم عملولي عملية بالجهاز التنفسي .. خدروني ودخلت غرفة العمليات .. شفتهم وهما بيفتحوا صدري .. كان في عدد كبير من الأطباء والممرضين ... وكانوا بيحكوا تركي والأطباء والممرضات متوترين .. في شاشة صارت تزمر .. وهما عيونهم علي .. بيحاولوا بيحاولوا .. أنا شايفهم وكنت أناديهم أنا هون أنا صاحي .. اطلعوا علي !! كأنهم مش سامعين مع أنه صوتي كان عالي.
إجوا إمي وأبوي واخواتي ووقفوا جنبي وكلنا صرنا نضحك سوا .. إمي وأبوي قالولي لا تعب حالك ما رح يسمعوك .. إحنا هلقيت صرنا عيلة وتجمعنا تاني .. يلا يا محمد نطلع بيتنا .. واخدوني وطرنا فوووق .. كان نفسي أتشكر كل أصحابي والأطباء يلي ساعدوني ..
لا تخافوا أنا بخير وإلي رجلين وجناحات حلوة كتير .. بأطير فيها لبعيد .. وصار إلي عيلة والتمينا كلنا سوا .. بحبكم كتير ورح ضل أدعيلكم .. ملتقانا الجنة إن شاء الله .
قصة كتبتها على لسان الشهيد بإذن الله #محمد_صيام الذي توفي اليوم في مستشفى تركي بعد اجراء عملية له في الرئة بعد اصابته في الحرب الأخيرة على غزة والتي فقد فيها 12 شخص من عائلته .
إرسال تعليق